Nakhāti vīsatiyā nakhapattānaṃ nāmaṃ. Te sabbepi vaṇṇato setā. Saṇṭhānato macchasakalikasaṇṭhānā. Disato pādanakhā heṭṭhimadisāya jātā, hatthanakhā uparimadisāyāti dvīsu disāsu jātā. Okāsato aṅgulīnaṃ aggapiṭṭhesu patiṭṭhitā. Paricchedato dvīsu disāsu aṅgulikoṭimaṃsehi, anto aṅgulipiṭṭhimaṃsena, bahi ceva agge ca ākāsena, tiriyaṃ aññamaññena paricchinnā. Dve nakhā ekato natthi. Ayaṃ nesaṃ sabhāgaparicchedo, visabhāgaparicchedo pana kesasadisoyeva.
Dantāti paripuṇṇadantassa dvattiṃsa dantaṭṭhikāni. Tepi vaṇṇato setā. Saṇṭhānato anekasaṇṭhānā. Tesañhi heṭṭhimāya tāva dantapāliyā majjhe cattāro dantā mattikapiṇḍe paṭipāṭiyā ṭhapitaalābubījasaṇṭhānā. Tesaṃ ubhosu passesu ekeko ekamūlako ekakoṭiko mallikamakulasaṇṭhāno. Tato ekeko dvimūlako dvikoṭiko yānakaupatthambhanikasaṇṭhāno, tato dve dve timūlā tikoṭikā. Tato dve dve catumūlā catukoṭikāti. Uparimapāliyāpi eseva nayo. Disato uparimadisāya jātā. Okāsato dvīsu hanukaṭṭhikesu patiṭṭhitā. Paricchedato heṭṭhā hanukaṭṭhike patiṭṭhitena attano mūlatalena, upari ākāsena, tiriyaṃ aññamaññena paricchinnā. Dve dantā ekato natthi. Ayaṃ nesaṃ sabhāgaparicchedo, visabhāgaparicchedo pana kesasadisoyeva.
Tacoti sakalasarīraṃ veṭhetvā ṭhitacammaṃ. Tassa upari kāḷasāmapītādivaṇṇā chavi nāmesā sakalasarīratopi saṅkaḍḍhiyamānā badaraṭṭhimattā hoti. Taco pana vaṇṇato setoyeva. So cassa setabhāvo aggijālābhighātapaharaṇappahārādīhi viddhaṃsitāya chaviyā pākaṭo hoti. Saṇṭhānato sarīrasaṇṭhānova hoti. Ayamettha saṅkhePo.
Vitthārato pana pādaṅgulitaco kosakārakakosasaṇṭhāno, piṭṭhipādataco puṭabandhaupāhanasaṇṭhāno, jaṅghataco bhattapuṭakatālapaṇṇasaṇṭhāno, ūrutaco taṇḍulabharitadīghathavikasaṇṭhāno, ānisadataco udakapūritapaṭaparissāvanasaṇṭhāno, piṭṭhitaco phalakonaddhacammasaṇṭhāno, kucchitaco vīṇādoṇikonaddhacammasaṇṭhāno, urataco yebhuyyena caturassasaṇṭhāno, ubhayabāhutaco tūṇīronaddhacammasaṇṭhāno, piṭṭhihatthataco khurakosakasaṇṭhāno phalakatthavikasaṇṭhāno vā, hatthaṅgulitaco kuñcikākosakasaṇṭhāno, gīvataco galakañcukasaṇṭhāno, mukhataco chiddāvachiddo kīṭakulāvakasaṇṭhāno, sīsataco pattatthavikasaṇṭhānoti.