Athekadivasaṃ ekā pesakāradhītā abhirūpā paṭhamavaye ṭhitā kambupeṇḍagāmato nikkhamitvā padumasaraṃ oruyha gāyamānā pupphāni bhañjati, tasmiṃ samaye sāmaṇero padumasaramatthakena gacchati, gacchanto pana sakkalasikāya kāṇamakkhikā viya tassā gītasadde bajjhi. Tāvadeva iddhi antarahitā, chinnapakkho kāko viya ahosi. Santasamāpattibalena pana tattheva udakapiṭṭhe apatitvā simbalītūlaṃ viya patamānaṃ anupubbena padumasaratīre aṭṭhāsi. So vegenāgantvā upajjhāyassa pattacīvaraṃ datvā nivatti. Mahāthero "pagevetaṃ mayā diṭṭhaṃ, nivāriyamānopi na nivattissatī"ti kiñci avatvā piṇḍāya pāvisi.

Sāmaṇero gantvā padumasaratīre aṭṭhāsi tassā paccuttaraṇaṃ āgamayamāno, sāpi sāmaṇeraṃ ākāsena gacchantañca punāgantvā ṭhitañca disvā "addhā esa maṃ nissāya ukkaṇṭhito"ti ñatvā "paṭikkama sāmaṇerā"ti āha. sopi paṭikkami. Itarā paccuttaritvā sāṭakaṃ nivāsetvā taṃ upasaṅkamitvā "kiṃ bhante"ti pucchi. So tamatthaṃ ārocesi. Sā bahūhi kāraṇehi gharāvāse ādīnavaṃ brahmacariyavāse ānisaṃsañca dassetvā ovadamānāpi tassa ukkaṇṭhaṃ vinodetuṃ asakkontī "ayaṃ mama kāraṇā evarūpāya iddhiyā parihīno, na idāni yuttaṃ pariccajitun"ti "idheva tiṭṭhā"ti vatvā gharaṃ gantvā mātāpitūnaṃ taṃ pavattiṃ ārocesi. Tepi gantvā nānappakāraṃ ovadamānā vacanaṃ agaṇhantaṃ āhaṃsu "tvaṃ amhe uccākulāti mā sallakkhesi, mayaṃ pesakārā, sakkhissasi pesakārakammaṃ kātun"ti. Sāmaṇero āha "upāsaka gihibhūto nāma pesakārakammaṃ vā kareyya naḷakārakammaṃ vā, kiṃ iminā, mā sāṭakamatte lobhaṃ karothā"ti. Pesakārako udare bandhasāṭakaṃ datvā gharaṃ netvā dhītaraṃ adāsi.

So pesakārakammaṃ uggaṇhitvā pesakārehi saddhiṃ sālāya kammaṃ karoti. Aññesaṃ itthiyo pātova bhattaṃ sampādetvā āhariṃsu. Tassa bhariyā na tāva