Tathābhūtassāti tenākārena bhūtassa, te chandādidhamme paṭilabhitvā ṭhitassāti attho. Vedanākkhandhotiādīhi chandādayo anto katvā cattāropi khandhā kathitā. Te dhammeti te cattāro arūpakkhandhe, chandādayo vā tayo dhammetipi vuttaṃ. Āsevatītiādīni vuttatthāneva. Sesaiddhipādaniddesesupi imināva nayena attho veditabbo.

Ettāvatā kiṃ kathitanti? catunnaṃ bhikkhūnaṃ matthakappattaṃ kammaṭṭhānaṃ kathitaṃ. Eko hi bhikkhu chandaṃ avassayati, kattukamyatākusaladhammacchandena atthanibbattiyaṃ sati ahaṃ lokuttaradhammaṃ nibbattessāmi, natthi mayhaṃ etassa nibbattane bhāroti chandaṃ jeṭṭhakaṃ chandaṃ dhuraṃ chandaṃ pubbaṅgamaṃ katvā lokuttaradhammaṃ nibbatteti. Eko viriyaṃ avassayati, eko cittaṃ avassayati, eko paññaṃ avassayati, paññāya atthanibbattiyaṃ sati ahaṃ lokuttaradhammaṃ nibbattessāmi, natthi mayhaṃ etassa nibbattane bhāroti paññaṃ jeṭṭhakaṃ paññaṃ dhuraṃ paññaṃ pubbaṅgamaṃ katvā lokuttaradhammaṃ nibbatteti.

Kathaṃ? yathā hi catūsu amaccaputtesu ṭhānantaraṃ patthetvā vicarantesu Eko upaṭṭhānaṃ avassayi, eko sūrabhāvaṃ, eko jātiṃ, eko mantaṃ, kathaṃ? tesu Hi paṭhamo upaṭṭhāne appamādakāritāya atthanibbattiyā sati labbhamānaṃ "lacchāmetaṃ ṭhānantaran"ti upaṭṭhānaṃ avassayi. Dutiyo upaṭṭhāne appamattopi "ekacco saṅgāme paccupaṭṭhite saṇṭhātuṃ na sakkoti, avassaṃ kho pana rañño paccanto kuppissati. Tasmiṃ kuppite rathadhure kammaṃ katvā rājānaṃ ārādhetvā āharāpessāmetaṃ ṭhānantaran"ti sūrabhāvaṃ avassayi. Tatiyo "sūrabhāvepi sati ekacco hīnajātiko hoti, jātiṃ sodhetvā ṭhānantaraṃ dadantā mayhaṃ dassantī"ti jātiṃ avassayi. Catuttho "jātimāpi eko amantaniyo hoti, mantena kattabbakicce uppanne āharāpessāmetaṃ ṭhānantaran"ti mantaṃ avassayi. Te sabbepi attano attano avassayabalena ṭhānantarāni pāpuṇiṃsu.