[588] Yantaṃ ariyā ācikkhantīti padaniddese pana kiñcāpi "ācikkhanti desentī"tiādīni sabbāneva aññamaññavevacanāni, evaṃ santepi "upekkhako satimā sukhavihārī"tiādiuddesavasena ācikkhanti, niddesavasena desenti, paṭiniddesavasena paññāpenti, tena tena pakārena atthaṃ ṭhapetvā paṭṭhapenti, tassa tassa atthassa kāraṇaṃ dassentā vivaranti, byañjanavibhāgaṃ dassentā vibhajanti, nikkujjitabhāvaṃ gambhīrabhāvañca nīharitvā sotūnaṃ ñāṇassa patiṭṭhaṃ janayantā uttāniṃ karonti, sabbehipi imehi ākārehi sotūnaṃ aññāṇandhakāraṃ vidhamentā pakāsentīti evamattho daṭṭhabbo.
Samatikkamaniddesepi tattha tattha tehi tehi dhammehi vuṭṭhitattā atikkanto, uparibhūmipattiyā vītikkanto. Tato aparihānibhāvena samatikkantoti evamattho daṭṭhabbo.
Suttantabhājanīyavaṇṇanā niṭṭhitā.
A. 1/160/215