Na abbokiṇṇāti aññena viññāṇena abbokiṇṇā nirantarāva na uppajjanti. Etena tesaṃ anantaratā paṭikkhittā.

[765] Na apubbaṃ acarimanti etena sabbesampi sahuppatti paṭikkhittā. Na aññamaññassa samanantarāti etena samanantaratā paṭikkhittā.

[766] Āvajjanā vātiādīni cattāripi āvajjanasseva nāmāni. Tañhi bhavaṅgassa āvajjanato āvajjanāti, tasseva ābhujanato ābhogoti, rūpādīnaṃ samannāharaṇato samannāhāroti, tesaṃyeva manasikaraṇato manasikāroti vuccati. Evamettha saṅkhepato pañcannaṃ viññāṇānaṃ āvajjanaṭṭhāne ṭhatvā āvajjanādikiccaṃ kātuṃ samatthabhāvo paṭikkhitto.

Na kañci dhammaṃ paṭivijānātīti "manopubbaṅgamā dhammā"ti evaṃ vuttaṃ ekampi kusalaṃ vā akusalaṃ vā na paṭivijānāti.