Tatridaṃ mahāsoṇattheravatthu kathetabbaṃ:- brāhmaṇatissabhaye kira cittalapabbate dvādasa bhikkhusahassāni paṭivasanti, tathā tissamahāvihāre. Dvīsupi mahāvihāresu tiṇṇaṃ vassānaṃ ekarattameva vatthaṃ mahāmūsikāyo khāditvā thusamattameva ṭhapesuṃ.

Tissamahāvihārepi bhikkhusaṃgho "cittalapabbate vatthaṃ vattissati, tattha gantvā vasissāmā"ti vihārato nikkhami. Ubhatopi ekissā gambhīrakandarāya tīre samāgantvā pucchitvā vatthassa khīṇabhāvaṃ ñatvā "tattha gantvā kiṃ karissāmā"ti catuvīsati bhikkhusahassāni gambhīrakandaravanaṃ pavisitvā nisīditvā nisinnanīhāreneva anupādisesāya nibbānadhātuyā parinibbāyiṃsu. Pacchā bhaye vūpasante bhikkhusaṃgho sakkaṃ devarājānaṃ gahetvā dhātuyo saṃharitvā cetiyaṃ akāsi.

Brāhmaṇatissacoropi janapadaṃ viddhaṃsesi. Saṃgho sannipatitvā mantetvā "coraṃ paṭibāhatū"ti sakkassa santikaṃ aṭṭha there pesesi. Sakko devarājā "mayā bhante uppanno coro na sakkā paṭibāhituṃ, saṃgho parasamuddaṃ gacchatu, ahaṃ samuddārakkhaṃ karissāmī"ti. Saṃgho sabbadisāhi nāgadīpaṃ gantvā jambukolapaṭṭane tibhūmikaṃ mahāuḷumpaṃ bandhāpesi. Ekā bhūmikā udake osīdi, ekissā bhikkhusaṃgho nisinno, ekissā pattacīvarāni ṭhapayiṃsu. Saṃyuttabhāṇakacūḷasivatthero isidattatthero mahāsoṇattheroti tayo therā tāsaṃ parisānaṃ pāmokkhā. Tesu dve therā mahāsoṇattheraṃ āhaṃsu "āvuso mahāsoṇa abhirūha mahāuḷumpan"ti. Tumhe pana bhanteti. Āvuso udake maraṇampi thale maraṇampi ettakameva, na mayaṃ gamissāma, taṃ nissāya pana anāgate sāsanassa paveṇī ṭhassati, gaccha tvaṃ āvusoti. "nāhaṃ bhante tumhesu agacchantesu gamissāmī"ti yāvatatiyaṃ kathetvāpi theraṃ āropetuṃ asakkontā nivattiṃsu.

Atha cūḷasivatthero isidattattheraṃ āha "āvuso isidatta anāgate mahāsoṇaṃ nissāya sāsanapaveṇī ṭhassati, mā kho naṃ hatthato vissajjehī"ti.