Thero cintesi "ayaṃ kilamantova rukkhaṃ āruḷho, kinnu kho idāni karissatī"ti. Sāmaṇero tālapaṇṇaṃ phāletvā phāletvā vāsidaṇḍake bandhitvā ghaṭento ghaṭento bhūmiyaṃ pātetvā "bhante sādhu vatassa, sace vāsiphalaṃ ettha paveseyyāthā"ti āha. Thero "upāyasampanno sāmaṇero"ti vāsiphalaṃ pavesetvā adāsi. So vāsiṃ ukkhipitvā tālaphalāni pātesi. Thero vāsiṃ pātāpetvā pavaṭṭitvā gataṃ tālaphalaṃ chinditvā sāmaṇeraṃ otiṇṇakāle āha "sāmaṇera tvaṃ dubbalo, idaṃ tāva khādāhī"ti. "nāhaṃ bhante tumhehi akhādite khādissāmī"ti vāsiṃ gaṇhitvā tālaphalāni chinditvā pattaṃ nīharitvā tālamiñjaṃ pakkhipitvā therassa datvā sayaṃ khādi. Yāva tālaphalāni ahesuṃ, tāva tattheva
Sāmaṇero therassa vasanaṭṭhānaṃ paṭijaggi. Thero sāmaṇerassa ovādaṃ datvā vihāraṃ pāvisi. Sāmaṇero "anāyatane naṭṭhānaṃ attabhāvānaṃ pamāṇaṃ natthi, buddhānaṃ upaṭṭhānaṃ karissāmī"ti cetiyaṅgaṇaṃ gantvā appaharitaṃ karoti, sattāhamattaṃ nirāhāratāya pavedhamāno patitvā nipannakova tiṇāni uddharati. Ekacce ca manussā araññe carantā madhuṃ labhitvā dārūni ceva sākapaṇṇañca gahetvā tiṇacalanasaññāya "migo nu kho eso"ti sāmaṇerassa santikaṃ gantvā "kiṃ karosi sāmaṇerā"ti āhaṃsu. Tiṇagaṇṭhiṃ gaṇhāmi upāsakāti. Aññopi koci atthi bhanteti. Āma upāsakā upajjhāyo me antogabbheti. "mahātherassa datvā khādeyyāsi bhante"ti sāmaṇerassa madhuṃ datvā attano vasanaṭṭhānaṃ ācikkhitvā "mayaṃ sākhābhaṅgaṃ karontā gamissāma, etāya saññāya theraṃ gahetvā āgaccheyyāsi ayyā"ti vatvā agamaṃsu.
Sāmaṇero madhuṃ gahetvā therassa santikaṃ gantvā bahi ṭhatvā "vandāmi bhante"ti āha. Thero "sāmaṇero jighacchāya anuḍayhamāno āgato bhavissatī"ti tuṇhī ahosi. Sopi puna "vandāmi bhante"ti āha. Kasmā sāmaṇera dubbalabhikkhūnaṃ sukhena nipajjituṃ na desīti. Dvāraṃ vivarituṃ te sāruppaṃ bhanteti. Thero uṭṭhahitvā dvāraṃ vivaritvā "kinte sāmaṇera laddhan"ti āha. Manussehi madhu dinnaṃ, khādituṃ sāruppaṃ bhanteti. Sāmaṇera evameva khādituṃ kilamissāma, pānakaṃ katvā pivissāmāti. Sāmaṇero pānakaṃ katvā therassa adāsi. Atha naṃ thero "manussānaṃ vasanaṭṭhānaṃ pucchasi sāmaṇerā"ti āha. Sayameva ācikkhiṃsu bhanteti. "sāmaṇera pātova gacchantā kilamissāma, ajjeva gamissāmā"ti pattacīvaraṃ gaṇhāpetvā nikkhami. Te gantvā manussānaṃ vasanaṭṭhānassa avidūre nipajjiṃsu.