Kasiṇaparikammaṃ karontesupi "etassa parikammamattameva bhavissati, nimittaṃ uppādetuṃ na sakkhissati, esa pana nimittaṃ uppādetuṃ sakkhissati, appanaṃ pāpetuṃ na sakkhissati. Esa appanaṃ pāpetvā jhānaṃ pādakaṃ katvā vipassanaṃ paṭṭhapetvā arahattaṃ gaṇhissatī"ti pajānātīti.

Tatiyabalaniddesavaṇṇanā.

Catutthabalaniddesa

[812] Catutthabalaniddese khandhanānattanti "ayaṃ rūpakkhandho nāma .pe. Ayaṃ viññāṇakkhandho nāmā"ti evaṃ pañcannaṃ khandhānaṃ nānākaraṇaṃ pajānāti. Tesupi "ekavidhena rūpakkhandho .pe. Ekādasavidhena rūpakkhandho. Ekavidhena vedanākkhandho .pe. Bahuvidhena vedanākkhandho. Ekavidhena saññākkhandho .pe. Ekavidhena saṅkhārakkhandho .pe. Ekavidhena viññāṇakkhandho .pe. Bahuvidhena viññāṇakkhandho"ti evaṃ ekekassa khandhassa nānattaṃ pajānāti. Āyatananānattanti "idaṃ cakkhvāyatanaṃ nāma .pe. Idaṃ dhammāyatanaṃ nāma. Tattha dasāyatanā kāmāvacarā, dve catubhūmikā"ti evaṃ āyatananānattaṃ pajānāti dhātunānattatanti "ayaṃ cakkhudhātu nāma .pe. Ayaṃ manoviññāṇadhātu nāma. Tattha soḷasa dhātuyo kāmāvacarā, dve catubhūmikā"ti evaṃ dhātunānattaṃ pajānāti.