"ahaṃ taruṇo, avasesasattānaṃ attabhāvo papāte ṭhitarukkhasadiso, ahaṃ pana paṭhamavaye ṭhito"ti majjanavasena uppanno māno yobbanamado nāma.

"ahaṃ ciraṃ jīviṃ, ciraṃ jīvāmi, ciraṃ jīvissāmi. Sukhaṃ jīviṃ, sukhaṃ jīvāmi, sukhaṃ jīvissāmī"ti majjanavasena uppanno māno jīvitamado nāma.

"ahaṃ lābhī, avasesā sattā appalābhā, mayhaṃ pana lābhassa pamāṇaṃ natthī"ti majjanavasena uppanno māno lābhamado nāma.

"avasesā sattā yaṃ vā taṃ vā labhanti, ahaṃ pana sukataṃ paṇītaṃ cīvarādipaccayaṃ labhāmī"ti majjanavasena uppanno māno sakkāramado nāma.