6. Chakkaniddesavaṇṇanā

[944] Chakkaniddese yasmā kuddho vā kodhavasena sandiṭṭhiparāmāsī vā sandiṭṭhiparāmasitāya kalahaṃ viggahaṃ vivādaṃ āpajjati, tasmā kodhādayo "vivādamūlānī"ti vuttā.

Chandarāganiddese kāmagehasitattā chandarāgā gehasitā dhammāti saṅgahato vatvā puna pabhedato dassetuṃ manāpiyesu rūpesūtiādi vuttaṃ. Tattha manāpiyesūti manavaḍḍhanakesu iṭṭhesu. Virodhāeva virodhavatthūni. Amanāpiyesūti aniṭṭhesu.