Evaṃ pana aggahetvā nibbānaṃ āgamma rāgādayo khīṇāti ekameva nibbānaṃ rāgakkhayo dosakkhayo mohakkhayoti vuccati. Tīṇipi hetāni nibbānasseva adhivacanānīti gaṇha.

Sace pana evaṃ vuttepi na sallakakheti, gotrabhunāpi kāretabbo. Kathaṃ? Evaṃ tāva pucchitabbo "tvaṃ gotrabhū nāma atthīti vadesī"ti. Āma vadāmīti. Gotrabhukkhaṇe kilesā khīṇā khīyanti khīyissantīti. Na khīṇā, na khīyanti, apica kho khīyissantīti. Gotrabhū pana kiṃ ārammaṇaṃ karotīti. Nibbānaṃ. Tava gotrabhukkhaṇe kilesā na khīṇā, na khīyanti, athakho khīyissanti. Tavaṃ akhīṇesuyeva kilesesu kilesakkhayaṃ nibbānaṃ paññapesi, appahīnesu anusayesu anusayappahānaṃ nibbānaṃ paññapesi. Taṃ te na sameti. Evaṃ pana aggahetvā nibbānaṃ āgamma rāgādayo khīṇāti ekameva nibbānaṃ rāgakkhayo dosakkhayo mohakkhayoti vuccati. Tīṇipi hetāni nibbānasseva adhivacanānīti gaṇha.

Sace pana evaṃ vuttepi na sallakkheti, maggena kāretababo. Kathaṃ? evaṃ Tāva pucchitabbo "tvaṃ maggaṃ nāma vadesī"ti. Āma vadāmīti. Maggakkhaṇe kilesā khīṇā khīyanti khīyissantīti. Jānamāno vakkhati "khīṇāti vā khīyissantīti vā vattuṃ na vaṭṭati, khīyantīti vattuṃ vaṭṭatī"ti. Yadi evaṃ maggassa kilesakkhayaṃ nibbānaṃ katamaṃ, maggena khīyanakakilesā katame, maggo katamaṃ kilesakkhayaṃ nibbānaṃ ārammaṇaṃ katvā katame kilese khepeti. Tasmā mā evaṃ gaṇha. Nibbānaṃ pana āgamma rāgādayo khīṇāti ekameva nibbānaṃ rāgakkhayo dosakkhayo mohakkhayoti vuccati. Tīṇipi hetāni nibbānasseva adhivacanānīti.

Evaṃ vutte evamāha "tvaṃ āgamma āgammāti vadesī"ti. Āma vadāmīti. "āgamma nāmā"ti idaṃ te kuto laddhanti. Suttato laddhanti. Āhara suttanti.