๑๐. ทสมนย วิปฺปยุตฺเตนวิปฺปยุตฺตปทวณฺณนา

[๓๕๓] อิทานิ วิปฺปยุตฺเตนวิปฺปยุตฺตปทํ ภาเชตุํ รูปกฺขนฺเธนาติอาทิ อารทฺธํ. ตตฺถ เย สมฺปโยควิปฺปโยคปทนิทฺเทเส รูปกฺขนฺธาทโย ธมฺมา อุทฺธฏา, สพฺพปุจฺฉาสุ เตเยว อุทฺธฏา. สทิสวิสฺสชฺชนานมฺปน เอกโต คหิตตฺตา ปทานิ อญฺญาย ปฏิปาฏิยา อาคตานิ. ตตฺถ ยํ ปทํ ปุจฺฉาย อุทฺธฏํ, ตํ เยหิ ธมฺเมหิ วิปฺปยุตฺตํ, เตสํ วเสน ขนฺธาทิวิภาโค เวทิตพฺโพ. รูปกฺขนฺเธน หิ เวทนาทโย วิปฺปยุตฺตา, เตหิ จ รูปกฺขนฺโธ วิปฺปยุตฺโต. นิพฺพานมฺปน สุขุมรูปคติกเมว. โส รูปกฺขนฺโธ จตูหิ ขนฺเธหิ เอเกน มนายตเนน สตฺตหิ วิญฺญาณธาตูหิ ธมฺมายตนธมฺมธาตูสุ เกหิจิ เวทนาทีหิ ธมฺเมเหว วิปฺปยุตฺโต. เอเสว นโย สพฺพตฺถาติ.

วิปฺปยุตฺเตนวิปฺปยุตฺตปทวณฺณนา นิฏฺฐิตา.