ฐิตตฺโตติ ฐิตสภาโว. อนาคามี หิ กามราคพฺยาปาเทหิ อกมฺปนียจิตฺตตาย จ ตมฺหา โลกา อนาวตฺติธมฺมตาย จ ฐิตสภาโว นาม. ติณฺโณติ ตณฺหาโสตํ โอติณฺโณ. ๑- ปารคโตติ ๒- นิพฺพานปารํ คโต. ถเล ติฏฺฐตีติ อรหตฺตผลสมาปตฺติถเล ติฏฺฐติ. เจโตวิมุตฺตินฺติ ผลสมาธึ. ปญฺญาวิมุตฺตินฺติ ผลญาณํ. อยํ วุจฺจตีติ อยํ ขีณาสโว "ติณฺโณ ปารงฺคโต ถเล ติฏฺฐติ พฺราหฺมโณ"ติ วุจฺจติ. พาหิตปาปตาย หิ เอส พฺราหฺมโณ นาม.
[๑๘๙] อปฺปสฺสุตาทีสุ อปฺปกํ สุตํ โหตีติ นวงฺเค สตฺถุสาสเน กิญฺจิเทว โถกํ สุตํ โหติ. น อตฺถมญฺญาย น ธมฺมมญฺญาย ธมฺมานุธมฺมปฏิปนฺโน โหตีติ อฏฺฐกถญฺจ ปาลิญฺจ ชานิตฺวา โลกุตฺตรธมฺมสฺส อนุรูปธมฺมํ ปุพฺพภาคปฏิปทํ ปฏิปนฺโน น โหติ. อิมินา นเยน สพฺพตฺถ อตฺโถ เวทิตพฺโพ.
[๑๙๐] สมณมจลาทีสุ สมณมจโลติ สมณอจโล, มกาโร ปทสนฺธิกโร, นิจฺจลสมโณ ถิรสมโณติ อตฺโถ. อยํ วุจฺจตีติ อยํ โสตาปนฺโน สาสเน มูลชาตาย สทฺธาย ปติฏฺฐิตตฺตา "สมณมจโล"ติ วุจฺจติ. สกทาคามี ปน รชฺชนกิเลสสฺส อตฺถิตาย สมณปทุโมติ วุตฺโต. รตฺตฏฺโฐ หิ อิธ ปทุมฏฺโฐ นามาติ วุตฺตํ. อนาคามี กามราคสงฺขาตสฺส รชฺชนกิเลสสฺส นตฺถิตาย สมณปุณฺฑรีโกติ วุตฺโต. ปณฺฑรฏฺโฐ หิ อิธ ปุณฺฑรีกฏฺโฐ นามาติ วุตฺตํ. ขีณาสโว จ ถทฺธภาวกรานํ กิเลสานํ อภาเวน สมเณสุ สมณสุขุมาโล นามาติ วุตฺโต. อปฺปทุกฺขฏฺเฐนาปิ เจส สมณสุขุมาโลเยวาติ.
จตุกฺกนิทฺเทสวณฺณนา นิฏฺฐิตา.