sattindriyā asaññābhavo ekavokārabhavo

paridevo sanidassanasappaṭighaṃ

anidassanaṃ punareva sappaṭighaṃ upādā"ti evaṃ uddānagāthāya dassitāneva. Tasmā tesaṃ vaseneva saṅgahāsaṅgaho veditabbo. Pañhavasena hi imasmiṃ vāre āyatanadhātuvaseneva sadisavissajjane vīsatidhamme samodhānetvā eko pañho kato, satta viññāṇadhātuyo samodhānetvā eko, sattindriyāni samodhānetvā eko, dve bhave samodhānetvā eko, paridevena ca sanidassanasappaṭighehi ca eko, anidassanasappaṭighehi eko, sanidassanehi eko, sappaṭighehi ca upādādhammehi ca ekoti aṭṭha pañhā katā. Tesu khandhādivibhāgo evaṃ veditabbo. Seyyathīdaṃ:- paṭhamapañhe tāva catūhi khandhehīti arūpakkhandhehi. Dvīhāyatanehīti cakkhvāyatanādīsu ekekena saddhiṃ manāyatanena. Aṭṭhahi dhātūhīti cakkhudhātuādīsu ekekāya saddhiṃ sattahi viñañāṇadhātūhi.

Tatrāyaṃ nayo:- cakkhvāyatanena hi khandhasaṅgahena rūpakkhandho saṅgahito. Tasmiṃ saṅgahite rūpakkhandhe āyatanasaṅgahena cakkhvāyatanamevekaṃ saṅgahitaṃ. Sesāni dasāyatanāni asaṅgahitāni. Dhātusaṅgahenapi tena cakkhudhātuyevekā saṅgahitā. Sesā dasa dhātuyo asaṅgahitā. Iti yāni tena asaṅgahitāni dasāyatanāni, tāni cakkhvāyatanamanāyatanehi dvīhi asaṅgahitāni. Yāpi tena asaṅgahitā dasa dhātuyo, tā cakkhudhātuyā ceva sattahi ca viññāṇadhātūhi asaṅgahitāti. Rūpāyatanādīsupi eseva nayo.