[238] Sukhindriyādipañhe tīhīti saññāsaṅkhāraviññāṇehi. Ekāya dhātuyāti kāyaviññāṇadhātuyā manoviññāṇadhātuyā ca. Chahi dhātūhīti kāyaviññāṇadhātuvajjāhi.

[245] Rūpabhavapañhe sabbesampi arūpakkhandhānaṃ arūpāyatanānañca atthitāya na kehicīti vuttaṃ. Arūpabhavapañhe ghānajivhākāyaviññāṇadhātūnaṃ pana natthitāya tīhi dhātūhi vippayuttoti vuttaṃ.

[256] Adhimokkhapañhe dvīhi dhātūhīti manodhātumanoviññāṇadhātūhi. Paṇṇarasahīti sesāhi dasahi rūpadhātūhi pañcahi ca cakkhuviññāṇādīhi.

[257] Kusalapañhe kusalehi catunnampi khandhānaṃ gahitattā sampayogo paṭikkhitto.