[214] Puggalassa uppādoti pucchā sakavādissa, "jātidhammā jarādhammā, atho maraṇadhammino"tiādīsu vuttavasena paṭiññā paravādissa. Saṅkhatabhāvaṃ panassa so na icchati, tasmā paṭikkhipati.

[215] Puna na uppādo paññāyatītiādinā nayena puṭṭho "dukkhameva hi sambhoti, dukkhaṃ tiṭṭhati veti cā"tiādivacanato puggalassa uppādādayo nāma na yujjantīti paṭijānāti.

[216] Atthatthamhīti atthaṃ vuccati nibbānaṃ, tattha atthīti pucchati. Tassa atthitāya sassataṃ, natthitāya ucchedo āpajjati. Tadubhayampi anicchanto pacchā paṭikkhipati.

Ñātakānuyogādivaṇṇanā niṭṭhitā.