[๕๑๒] กามาวจเรหิ ธมฺเมหิ เย ธมฺมา ปริยาปนฺเนหิ ธมฺเมหิ เย ธมฺมา สอุตฺตเรหิ ธมฺเมหิ เย ธมฺมา วิปฺปยุตฺตา เต ธมฺมา จตูหิ ขนฺเธหิ ทฺวีหายตเนหิ ทฺวีหิ ธาตูหิ สงฺคหิตา ฯ กตีหิ อสงฺคหิตา ฯ เอเกน ขนฺเธน ทสหายตเนหิ โสฬสหิ ธาตูหิ อสงฺคหิตา ฯ

[๕๑๓] น กามาวจเรหิ ธมฺเมหิ เย ธมฺมา อปริยาปนฺเนหิ ธมฺเมหิ เย ธมฺมา อนุตฺตเรหิ ธมฺเมหิ เย ธมฺมา วิปฺปยุตฺตา เต ธมฺมา จตูหิ ขนฺเธหิ ทฺวีหายตเนหิ อฏฺฐหิ ธาตูหิ สงฺคหิตา ฯ กตีหิ อสงฺคหิตา ฯ เอเกน ขนฺเธน ทสหายตเนหิ ทสหิ ธาตูหิ อสงฺคหิตา ฯ

[๕๑๔] รูปาวจเรหิ ธมฺเมหิ เย ธมฺมา อรูปาวจเรหิ ธมฺเมหิ เย ธมฺมา นิยฺยานิเกหิ ธมฺเมหิ เย ธมฺมา นิยเตหิ ธมฺเมหิ เย ธมฺมา สรเณหิ ธมฺเมหิ เย ธมฺมา วิปฺปยุตฺตา เต ธมฺมา อสงฺขตํ ขนฺธโต ฐเปตฺวา ปญฺจหิ ขนฺเธหิ ทฺวาทสหายตเนหิ อฏฺฐารสหิ ธาตูหิ สงฺคหิตา ฯ กตีหิ อสงฺคหิตา ฯ น เกหิจิ ขนฺเธหิ น เกหิจิ อายตเนหิ น กาหิจิ ธาตูหิ อสงฺคหิตา ฯ

[๕๑๕] น รูปาวจเรหิ ธมฺเมหิ เย ธมฺมา น อรูปาวจเรหิ ธมฺเมหิ เย ธมฺมา อนิยฺยานิเกหิ ธมฺเมหิ เย ธมฺมา อนิยเตหิ ธมฺเมหิ เย ธมฺมา อสรเณหิ ธมฺเมหิ เย ธมฺมา วิปฺปยุตฺตา เต ธมฺมา กตีหิ ขนฺเธหิ กตีหายตเนหิ กตีหิ ธาตูหิ สงฺคหิตา ฯ เต ธมฺมา จตูหิ ขนฺเธหิ ทฺวีหายตเนหิ ทฺวีหิ ธาตูหิ สงฺคหิตา ฯ กตีหิ อสงฺคหิตา ฯ เอเกน ขนฺเธน ทสหายตเนหิ โสฬสหิ ธาตูหิ อสงฺคหิตา ฯ ธมฺมายตนํ ธมฺมธาตุ อถ ชีวิตํ นามรูปํ สฬายตนชาติโย ชรา มตญฺจ เทฺว จ ติเก น ลพฺภเร ปฐมนฺตเร สตฺต โคจฺฉเก ทส อปรนฺเต จุทฺทส ฉ จ มตฺถเก อิจฺเจเต สตฺตจตฺตาลีสธมฺมา สมุจฺเฉเทน จ ลพฺภนฺติ โมฆปุจฺฉเกน จาติ ฯ วิปฺปยุตฺเตนสงฺคหิตาสงฺคหิตปทนิทฺเทโส นิฏฺฐิโต ฯ ธาตุกถาปกรณํ สมตฺตํ ฯ ______________ อภิธมฺมปิฏเก ปุคฺคลปญฺญตฺติ _________ นโม ตสฺส ภควโต อรหโต สมฺมาสมฺพุทฺธสฺส ฯ อุทฺเทสวาโร