[๒๑] กตโม จ ปุคฺคโล ปริหานธมฺโม อิเธกจฺโจ ปุคฺคโล ลาภี โหติ รูปสหคตานํ วา อรูปสหคตานํ วา สมาปตฺตีนํ โส จ โข น นิกามลาภี โหติ น อกิจฺฉลาภี น อกสิรลาภี น ยตฺถิจฺฉกํ ยทิจฺฉกํ ยาวติจฺฉกํ สมาปชฺชติปิ วุฏฺฐาติปิ ฐานํ โข ปเนตํ วิชฺชติ ยํ โส ปุคฺคโล ปมาทมาคมฺม ตาหิ สมาปตฺตีหิ ปริหาเยยฺย อยํ วุจฺจติ ปุคฺคโล ปริหานธมฺโม ฯ

[๒๒] กตโม จ ปุคฺคโล อปริหานธมฺโม อิเธกจฺโจ ปุคฺคโล ลาภี โหติ รูปสหคตานํ วา อรูปสหคตานํ วา สมาปตฺตีนํ โส จ โข นิกามลาภี โหติ อกิจฺฉลาภี อกสิรลาภี ยตฺถิจฺฉกํ ยทิจฺฉกํ ยาวติจฺฉกํ สมาปชฺชติปิ วุฏฺฐาติปิ อฏฺฐานเมตํ อนวกาโส ยํ โส ปุคฺคโล ปมาทมาคมฺม ตาหิ สมาปตฺตีหิ ปริหาเยยฺย อยํ วุจฺจติ ปุคฺคโล อปริหานธมฺโม ฯ สพฺเพปิ อริยปุคฺคลา อริเย วิโมกฺเข อปริหานธมฺมา ฯ

[๒๓] กตโม จ ปุคฺคโล เจตนาภพฺโพ อิเธกจฺโจ ปุคฺคโล ลาภี โหติ รูปสหคตานํ วา อรูปสหคตานํ วา สมาปตฺตีนํ โส จ โข น นิกามลาภี โหติ น อกิจฺฉลาภี น อกสิรลาภี น ยตฺถิจฺฉกํ ยทิจฺฉกํ ยาวติจฺฉกํ สมาปชฺชติปิ วุฏฺฐาติปิ สเจ อนุสญฺเจเตติ น ปริหายติ ตาหิ สมาปตฺตีหิ สเจ น อนุสญฺเจเตติ ปริหายติ ตาหิ สมาปตฺตีหิ อยํ วุจฺจติ ปุคฺคโล เจตนาภพฺโพ ฯ

[๒๔] กตโม จ ปุคฺคโล อนุรกฺขนาภพฺโพ อิเธกจฺโจ ปุคฺคโล ลาภี โหติ รูปสหคตานํ วา อรูปสหคตานํ วา สมาปตฺตีนํ โส จ โข น นิกามลาภี โหติ น อกิจฺฉลาภี น อกสิรลาภี น ยตฺถิจฺฉกํ ยทิจฺฉกํ ยาวติจฺฉกํ สมาปชฺชติปิ วุฏฺฐาติปิ สเจ อนุรกฺขติ น ปริหายติ ตาหิ สมาปตฺตีหิ สเจ นานุรกฺขติ ปริหายติ ตาหิ สมาปตฺตีหิ อยํ วุจฺจติ ปุคฺคโล อนุรกฺขนาภพฺโพ ฯ