[๕๗] กตโม จ ปุคฺคโล โสตาปนฺโน โสตาปตฺติผลสจฺฉิกิริยาย ปฏิปนฺโน ติณฺณํ สญฺโญชนานํ ปหานาย ปฏิปนฺโน ปุคฺคโล โสตาปตฺติผลสจฺฉิกิริยาย ปฏิปนฺโน ยสฺส ปุคฺคลสฺส ตีณิ สญฺโญชนานิ ปหีนานิ อยํ วุจฺจติ ปุคฺคโล โสตาปนฺโน ฯ กามราคพฺยาปาทานํ ตนุภาวาย ปฏิปนฺโน ปุคฺคโล สกทาคามิผลสจฺฉิกิริยาย ปฏิปนฺโน ยสฺส ปุคฺคลสฺส กามราคพฺยาปาทา ตนุภูตา อยํ วุจฺจติ ปุคฺคโล สกทาคามี ฯ กามราคพฺยาปาทานํ อนวเสสปฺปหานาย ปฏิปนฺโน ปุคฺคโล อนาคามิผลสจฺฉิกิริยาย ปฏิปนฺโน ยสฺส ปุคฺคลสฺส กามราคพฺยาปาทา อนวเสสา ปหีนา อยํ วุจฺจติ ปุคฺคโล อนาคามี ฯ รูปราคอรูปราคมานอุทฺธจฺจอวิชฺชาย อนวเสสปฺปหานาย ปฏิปนฺโน ปุคฺคโล อรหตฺตผลสจฺฉิกิริยาย ปฏิปนฺโน ยสฺส ปุคฺคลสฺส รูปราโค อรูปราโค มาโน อุทฺธจฺจํ อวิชฺชา อนวเสสา ปหีนา อยํ วุจฺจติ ปุคฺคโล อรหา ฯ เอกกนิทฺเทโส นิฏฺฐิโต ฯ __________ ทุกนิทฺเทโส