[๑๑๑] จตฺตาโร วลาหกา คชฺชิตา โน วสฺสิตา วสฺสิตา โน คชฺชิตา คชฺชิตา จ วสฺสิตา จ เนว คชฺชิตา โน วสฺสิตา ฯ

[๑๑๒] เอวเมว จตฺตาโรเม วลาหกูปมา ปุคฺคลา สนฺโต สํวิชฺชมานา โลกสฺมึ ฯ กตเม จตฺตาโร ฯ คชฺชิตา โน วสฺสิตา วสฺสิตา โน คชฺชิตา คชฺชิตา จ วสฺสิตา จ เนว คชฺชิตา โน วสฺสิตา ฯ กถญฺจ ปุคฺคโล คชฺชิตา โหติ โน วสฺสิตา อิเธกจฺโจ ปุคฺคโล ภาสิตา โหติ โน กตฺตา เอวํ ปุคฺคโล คชฺชิตา โหติ โน วสฺสิตา เสยฺยถาปิ โส วลาหโก คชฺชิตา โน วสฺสิตา ตถูปโม อยํ ปุคฺคโล ฯ กถญฺจ ปุคฺคโล วสฺสิตา โหติ โน คชฺชิตา อิเธกจฺโจ ปุคฺคโล กตฺตา โหติ โน ภาสิตา เอวํ ปุคฺคโล วสฺสิตา โหติ โน คชฺชิตา เสยฺยถาปิ โส วลาหโก วสฺสิตา โน คชฺชิตา ตถูปโม อยํ ปุคฺคโล ฯ กถญฺจ ปุคฺคโล คชฺชิตา จ โหติ วสฺสิตา จ อิเธกจฺโจ ปุคฺคโล ภาสิตา จ โหติ กตฺตา จ เอวํ ปุคฺคโล คชฺชิตา จ โหติ วสฺสิตา จ เสยฺยถาปิ โส วลาหโก คชฺชิตา จ วสฺสิตา จ ตถูปโม อยํ ปุคฺคโล ฯ กถญฺจ ปุคฺคโล เนว คชฺชิตา โหติ โน วสฺสิตา อิเธกจฺโจ ปุคฺคโล เนว ภาสิตา โหติ โน กตฺตา เอวํ ปุคฺคโล เนว คชฺชิตา โหติ โน วสฺสิตา เสยฺยถาปิ โส วลาหโก เนว คชฺชิตา โน วสฺสิตา ตถูปโม อยํ ปุคฺคโล ฯ อิเม จตฺตาโร วลาหกูปมา ปุคฺคลา สนฺโต สํวิชฺชมานา โลกสฺมึ ฯ ตตฺถ กตเม จตฺตาโร มูสิกูปมา ปุคฺคลา ฯ

[๑๑๓] จตสฺโส มูสิกา คาธํ กตฺตา โน วสิตา วสิตา โน คาธํ กตฺตา คาธํ กตฺตา จ วสิตา จ เนว คาธํ กตฺตา โน วสิตา ฯ

[๑๑๔] เอวเมว จตฺตาโรเม มูสิกูปมา ปุคฺคลา สนฺโต สํวิชฺชมานา โลกสฺมึ ฯ กตเม จตฺตาโร ฯ คาธํ กตฺตา โน วสิตา วสิตา โน คาธํ กตฺตา คาธํ กตฺตา จ วสิตา จ เนว คาธํ กตฺตา โน วสิตา ฯ กถญฺจ ปุคฺคโล คาธํ กตฺตา โหติ โน วสิตา อิเธกจฺโจ ปุคฺคโล ธมฺมํ ปริยาปุณาติ สุตฺตํ เคยฺยํ เวยฺยากรณํ คาถํ อุทานํ อิติวุตฺตกํ ชาตกํ อพฺภูตธมฺมํ เวทลฺลํ โส อิทํ ทุกฺขนฺติ ยถาภูตํ นปฺปชานาติ อยํ ทุกฺขสมุทโยติ ยถาภูตํ นปฺปชานาติ อยํ ทุกฺขนิโรโธติ ยถาภูตํ นปฺปชานาติ อยํ ทุกฺขนิโรธคามินี ปฏิปทาติ ยถาภูตํ นปฺปชานาติ เอวํ ปุคฺคโล คาธํ กตฺตา โหติ โน วสิตา เสยฺยถาปิ สา มูสิกา คาธํ กตฺตา โน วสิตา ตถูปโม อยํ ปุคฺคโล ฯ กถญฺจ ปุคฺคโล วสิตา โหติ โน คาธํ กตฺตา อิเธกจฺโจ ปุคฺคโล ธมฺมํ น ปริยาปุณาติ สุตฺตํ เคยฺยํ เวยฺยากรณํ คาถํ อุทานํ อิติวุตฺตกํ ชาตกํ อพฺภูตธมฺมํ เวทลฺลํ โส อิทํ ทุกฺขนฺติ ยถาภูตํ ปชานาติ อยํ ทุกฺขสมุทโยติ ยถาภูตํ ปชานาติ อยํ ทุกฺขนิโรโธติ ยถาภูตํ ปชานาติ อยํ ทุกฺขนิโรธคามินี ปฏิปทาติ ยถาภูตํ ปชานาติ เอวํ ปุคฺคโล วสิตา โหติ โน คาธํ กตฺตา เสยฺยถาปิ สา มูสิกา วสิตา โน คาธํ กตฺตา ตถูปโม อยํ ปุคฺคโล ฯ กถญฺจ ปุคฺคโล คาธํ กตฺตา จ โหติ วสิตา จ อิเธกจฺโจ ปุคฺคโล ธมฺมํ ปริยาปุณาติ สุตฺตํ เคยฺยํ เวยฺยากรณํ คาถํ อุทานํ อิติวุตฺตกํ ชาตกํ อพฺภูตธมฺมํ เวทลฺลํ โส อิทํ ทุกฺขนฺติ ยถาภูตํ ปชานาติ อยํ ทุกฺขสมุทโยติ ยถาภูตํ ปชานาติ อยํ ทุกฺขนิโรโธติ ยถาภูตํ ปชานาติ อยํ ทุกฺขนิโรธคามินี ปฏิปทาติ ยถาภูตํ ปชานาติ เอวํ ปุคฺคโล คาธํ กตฺตา จ โหติ วสิตา จ เสยฺยถาปิ สา มูสิกา คาธํ กตฺตา จ วสิตา จ ตถูปโม อยํ ปุคฺคโล ฯ กถญฺจ ปุคฺคโล เนว คาธํ กตฺตา โหติ โน วสิตา อิเธกจฺโจ ปุคฺคโล ธมฺมํ น ปริยาปุณาติ สุตฺตํ เคยฺยํ เวยฺยากรณํ คาถํ อุทานํ อิติวุตฺตกํ ชาตกํ อพฺภูตธมฺมํ เวทลฺลํ โส อิทํ ทุกฺขนฺติ ยถาภูตํ นปฺปชานาติ อยํ ทุกฺขสมุทโยติ ยถาภูตํ นปฺปชานาติ อยํ ทุกฺขนิโรโธติ ยถาภูตํ นปฺปชานาติ อยํ ทุกฺขนิโรธคามินี ปฏิปทาติ ยถาภูตํ นปฺปชานาติ เอวํ ปุคฺคโล เนว คาธํ กตฺตา โหติ โน วสิตา เสยฺยถาปิ สา มูสิกา เนว คาธํ กตฺตา โน วสิตา ตถูปโม อยํ ปุคฺคโล ฯ อิเม จตฺตาโร มูสิกูปมา ปุคฺคลา สนฺโต สํวิชฺชมานา โลกสฺมึ ฯ ตตฺถ กตเม จตฺตาโร อมฺพูปมา ปุคฺคลา ฯ