อภิญญานุโยค

Na vattabbaṃ puggalo upalabbhati sacchikaṭṭhaparamaṭṭhenāti . Āmantā . nanu atthi koci iddhiṃ vikubbatīti . āmantā . Hañci atthi koci iddhiṃ vikubbati tena vata re vattabbe puggalo upalabbhati sacchikaṭṭhaparamaṭṭhenāti. {165.1} Na vattabbaṃ puggalo upalabbhati sacchikaṭṭhaparamaṭṭhenāti. Āmantā . nanu atthi koci dibbāya sotadhātuyā saddaṃ suṇāti .pe. Paracittaṃ jānāti .pe. pubbenivāsaṃ anussarati .pe. dibbena cakkhunā rūpaṃ passati .pe. āsavānaṃ khayaṃ sacchikarotīti. Āmantā. Hañci atthi koci āsavānaṃ khayaṃ sacchikaroti tena vata re vattabbe puggalo upalabbhati sacchikaṭṭhaparamaṭṭhenāti. {165.2} Atthi koci iddhiṃ vikubbatīti katvā tena ca kāraṇena puggalo upalabbhati sacchikaṭṭhaparamaṭṭhenāti . āmantā . yo iddhiṃ vikubbati sveva puggalo yo iddhiṃ na vikubbati na so puggaloti. Na hevaṃ vattabbe .pe. Yo dibbāya sotadhātuyā saddaṃ suṇāti .pe. Yo paracittaṃ jānāti .pe. Yo pubbenivāsaṃ anussarati .pe. Yo dibbena cakkhunā rūpaṃ passati .pe. Yo Āsavānaṃ khayaṃ sacchikaroti sveva puggalo yo āsavānaṃ khayaṃ na sacchikaroti na so puggaloti. Na hevaṃ vattabbe .pe. Abhiññānuyogo.