๘. สมาปนโนสทฺทํสุณาตีติกถาวณฺณนา

[๘๒๓-๘๒๕] อิทานิ สมาปนฺโน สทฺทํ สุณาตีติกถา นาม โหติ. ตตฺถ "ยสฺมา ปฐมสฺส ฌานสฺส สทฺโท กณฺฏโก ๑- วุตฺโต ภควตา, ยทิ จ สมาปนฺโน ตํ น สุเณยฺย, กถํ กณฺฏโก สิยา. ตสฺมา สมาปนฺโน สทฺทํ สุณาตี"ติ เยสํ ลทฺธิ เสยฺยถาปิ ปุพฺพเสลิยานํ, เต สนฺธาย ปุจฺฉา สกวาทิสฺส, ปฏิญฺญา อิตรสฺส. จกฺขุนา รูปํ ปสฺสตีติอาทิ "สมาปนฺนสฺส ตาว ปญฺจทฺวารปฺปวตฺตํ นตฺถิ, ตสฺมึ อสติ ยทิ โส สทฺทํ สุเณยฺย, รูปมฺปิ ปสฺเสยฺยา"ติ โจทนตฺถํ วุตฺตํ. สทฺโท กณฺฏโกติ วิกฺเขปกรณตฺตา ๒- วุตฺตํ. โอฬาริเกน หิ สทฺเทน โสเต ฆฏฺฏิเต ปฐมชฺฌานโต วุฏฺฐานํ โหติ, เตเนตํ วุตฺตํ, ตสฺมา อสาธกํ. ทุติยสฺส ฌานสฺสาติอาทิ "ยถา อญฺโญปิ กณฺฏโก อนฺโตสมาปตฺติยํ นตฺถิ, เอวํ สทฺทสวนมฺปี"ติ โพธนตฺถํ วุตฺตํ, ตํ สพฺพํ อุตฺตานตฺถเมวาติ.

สมาปนฺโนสทฺทํสุณาตีติกถาวณฺณนา นิฏฺฐิตา.