๔. ทานกถาวณฺณนา

[๔๗๘] อิทานิ ทานกถา นาม โหติ. ตตฺถ ทานํ นาม ติวิธํ จาคเจตนาปิ วิรติปิ เทยฺยธมฺโมปิ. "สทฺธา หิริยํ กุสลญฺจ ทานนฺ"ติ ๑- อาคตฏฺฐาเน จาคเจตนา ทานํ. "อภยํ เทตี"ติ ๒- อาคตฏฺฐาเน วิรติ. "ทานํ เทติ อนฺนํ ปานนฺ"ติ อาคตฏฺฐาเน เทยฺยธมฺโม. ตตฺถ จาคเจตนา "เทติ วา เทยฺยธมฺมํ, เทนฺติ วา เอตาย เทยฺยธมฺมนฺ"ติ ทานํ. วิรติ อวขณฺฑนฏฺเฐน ลวนฏฺเฐน วา ทานํ. สา หิ อุปฺปชฺชมานา ภยเภรวาทิสงฺขาตํ ทุสฺสีลฺยเจตนํ ทาติ ขณฺเฑติ ลุนาติ วาติ ทานํ. เทยฺยธมฺโม ทิยฺยตีติ ทานํ. เอวเมตํ ติวิธมฺปิ อตฺถโต เจตสิโก เจว ธมฺโม เทยฺยธมฺโม จาติ ทุวิธํ โหติ. ตตฺถ เยสํ "เจตสิโกว ธมฺโม ทานํ, น เทยฺยธมฺโม"ติ ลทฺธิ เสยฺยถาปิ ราชคิริกสิทฺธตฺถิกานํ, เต สนฺธาย เจตสิโกติ ปุจฺฉา สกวาทิสฺส, ปฏิญฺญา อิตรสฺส. อถ นํ เทยฺยธมฺมวเสน โจเทตุํ ลพฺภาติ ปุจฺฉา

[๔๗๙] อนิฏฺฐผลนฺติอาทิ อเจตสิกสฺส ธมฺมสฺส ทานภาวทีปนตฺถํ วุตฺตํ. น หิ อเจตสิโก อนฺนาทิธมฺโม อายตึ วิปากํ เทติ, อิฏฺฐผลภาวนิยามตฺถํ ปเนตํ วุตฺตนฺติ เวทิตพฺพํ. อยมฺปิ เหตฺถ อธิปฺปาโย:- ยทิ อเจตสิโก อนฺนาทิธมฺโม ทานํ ภเวยฺย, หิตจิตฺเตน อนิฏฺฐํ อกนฺตํ เภสชฺชํ เทนฺตสฺส นิมฺพพีชาทีหิ วิย นิมฺพาทโย อนิฏฺฐเมว ผลํ นิพฺพตฺเตยฺย. ยสฺมา ปเนตฺถ หิตผรณจาคเจตนา ทานํ, ตสฺมา อนิฏฺเฐปิ เทยฺยธมฺเม ทานํ อิฏฺฐผลเมว โหตีติ.