๘. ชรามรณํวิปาโกติกถาวณฺณนา

[๔๙๕] อิทานิ ชรามรณํ วิปาโกติกถา นาม โหติ. ตตฺถ เยสํ "อตฺถิ ทุพฺพณฺณสํวตฺตนิยํ กมฺมํ อปฺปายุกสํวตฺตนิยํ กมฺมนฺ"ติ เอตฺถ ทุพฺพณฺณตา นาม ชรา, อปฺปายุกตา นาม มรณํ, ตํสํวตฺตนิยญฺจ กมฺมํ อตฺถิ. ตสฺมา

[๔๙๖] อกุสลานํ ธมฺมานํ ชรามรณํ อกุสลานํ ธมฺมานํ วิปาโกติ ปเญฺห ชรามรเณน นาม อนิฏฺฐวิปาเกน ภวิตพฺพนฺติ ลทฺธิยา ปฏิชานาติ. เตเนว การเณน กุสลานํ ธมฺมานํ ชรามรณสฺส กุสลวิปากตํ ปฏิกฺขิปติ, ปรโต จสฺส อกุสลวิปากตญฺเญว ปฏิชานาติ.