๘. ชีวิตาโวโรปนกถาวณฺณนา

[๖๔๘-๖๔๙] อิทานิ ชีวิตาโวโรปนกถา นาม โหติ. ตตฺถ ยสฺมา โทสสมฺปยุตฺตจิตฺเตน ปาณาติปาโต โหติ, โทโส จ ทิฏฺฐิสมฺปนฺนสฺส อปฺปหีโน, ตสฺมา "ทิฏฺฐิสมฺปนฺโน สญฺจิจฺจ ปาณํ ชีวิตา โวโรเปยฺยา"ติ เยสํ ลทฺธิ เสยฺยถาปิ ปุพฺพเสลิยานํ, ๑- เต สนฺธาย ทิฏฺฐิสมฺปนฺโนติ ปุจฺฉา สกวาทิสฺส, ปฏิญฺญา อิตรสฺส. สญฺจิจฺจ มาตรนฺติอาทิปเญฺหสุ ปน "อฏฺฐานเมตํ อนวกาโส"ติ สุตฺตภเยน ปฏิกฺขิปติ. สตฺถริ อคารโวติอาทิ สตฺถาราทีสุ สคารวสฺส สิกฺขาปทํ ๒- วีติกฺกมาภาวทสฺสนตฺถํ วุตฺตํ. อิตโร ปน อกุสลวเสน ตสฺส อคารโว นาม นตฺถีติ ปฏิกฺขิปิตฺวา สคารวภาวญฺจ สมฺปฏิจฺฉิตฺวา ปุน อคารโวติ ปุฏฺโฐ เตสุ เตสุ กิจฺเจสุ ปสุตตาย วิกฺขิตฺตานํ อสติยา อมนสิกาเรน เจติเย อภิวาทน- ปทกฺขิณกรณาภาวํ สนฺธาย ปฏิชานาติ. ปุน โอหเนยฺยาติอาทินา ๓- นเยน ปุฏฺโฐ ตาทิสาย กิริยาย สญฺจิจฺจ อกรณโต ปฏิกฺขิปติ. เสสเมตฺถ อุตฺตานตฺถเมวาติ.

ชีวิตาโวโรปนกถาวณฺณนา นิฏฺฐิตา.