5. Rūpadhātukathāvaṇṇanā

[515-516] Idāni rūpadhātukathā nāma hoti. Tattha "rūpinova dhammā rūpadhātu nāmā"ti yesaṃ laddhi seyyathāpi andhakānaṃ, te sandhāya rūpinoti pucchā sakavādissa, paṭiññā itarassa. Atha naṃ sakavādī yasmā rūpadhātu nāma rūpabhavo, na rūpamattameva, tasmā tenatthena codetuṃ rūpadhātūtiādimāha. Taṃ sabbaṃ kāmaguṇakathāyaṃ vuttanayeneva veditabbaṃ. Sāva kāmadhātūti puṭṭho bhūmiparicchedavirodhaṃ sampassamāno paṭikkhipati. Puna daḷhaṃ katvā puṭṭho attano laddhivasena paṭijānāti. Evaṃ sante pana dvīhi bhavehi samannāgatatā āpajjati, tena taṃ sakavādī kāmabhavena cātiādimāha. Itaro ekassa dvīhi bhavehi samannāgatābhāvato paṭikkhipatīti.

Rūpadhātukathāvaṇṇanā niṭṭhitā.