5. Aññoanusayotikathāvaṇṇanā

[700-701] Idāni añño anusayotikathā nāma hoti. Tattha yasmā puthujjano kusalābyākate citte vattamāne sānusayoti vattabbo, na pariyuṭṭhitoti, tasmā añño anusayo aññaṃ pariyuṭṭhānanti yesaṃ laddhi seyyathāpi andhakānaṃ, te sandhāya añño kāmarāgānusayoti pucchā sakavādissa, paṭiññā itarassa.

Sānusayotiādi pana tasmiṃ samaye anusayassa appahīnattā sānusayoti vattabbataṃ anuppannattā ca pariyuṭṭhitoti avattabbataṃ dīpeti, na anusayapariyuṭṭhānānaṃ aññattaṃ, tasmā asādhakanti.

Aññoanusayotikathāvaṇṇanā niṭṭhitā.