9. Hevatthītikathāvaṇṇanā *-

[304] Idāni hevatthītikathā nāma hoti. Tattha yesaṃ "sabbepi atītādibhedā dhammā rūpādivasena atthi, atītaṃ anāgatapaccuppannavasena anāgatapaccuppannāni vā atītādivasena natthi, tasmā sabbamevidaṃ evaṃ atthi evaṃ natthī"ti laddhi seyyathāpi etarahi vuttappabhedānaṃ andhakānaṃ, te sandhāya atītaṃ atthīti pucchā sakavādissa. Hevatthi heva natthīti vissajjanaṃ paravādissa. Tattha hevāti evaṃ. Atha naṃ sakavādī "yadi atītova evaṃ atthi evaṃ natthīti laddhi, evaṃ sante soyeva atthi, soyeva natthi nāmā"ti pucchanto sevatthi,

@4 cha.Ma. suttasādhanā uttānatthāyevāti * cha.Ma. hevatthikathāvaṇṇanā Seva natthīti āha. Itaro teneva sabhāvena atthitaṃ teneva natthitaṃ sandhāya paṭikkhipati. Dutiyaṃ puṭṭho sakabhāveneva atthitaṃ parabhāveneva natthitaṃ sandhāya paṭijānāti. Tato paraṃ atthaṭṭho natthaṭṭhoti atthi sakabhāvo natthi sakabhāvo nāma hotīti pucchati. Imināva upāyena sabbavāresu attho veditabbo. Pariyosāne pana "tena hi atītaṃ hevatthi, heva natthī"ti ca "tena hi rūpaṃ hevatthi, heva natthī"ti cātiādīni vatvā kiñcāpi paravādinā laddhi patiṭṭhāpitā, ayoniso patiṭṭhāpitattā panesā appatiṭṭhāpitāyevāti.