9. Anupubbābhisamayakathāvaṇṇanā

[339] Idāni anupubbābhisamayakathā nāma hoti. Tattha yesaṃ

"anupubbena medhāvī thokaṃ thokaṃ khaṇe khaṇe

kammāro rajatasseva niddhame malamattano"ti ādīni suttāni ayoniso gahetvā "sotāpattiphalasacchikiriyāya paṭipanno ekacce kilese dukkhassa dassanena pajahati, ekacce samudayanirodhamaggadassanena, tathā sesāti evaṃ soḷasahi koṭṭhāsehi anupubbena kilesappahānaṃ katvā arahattapaṭilābho hotī"ti evarūpā nānābhisamayaladdhi uppannā seyyathāpi etarahi andhakasabbatthikavādasamitiyabhadrayānikānaṃ, tesaṃ laddhivivecanatthaṃ anupubbābhisamayoti pucchā sakavādissa, paṭiññā itarassa. Anupubbena sotāpattimagganti puṭṭho pana ekassa maggassa bahubhāvāpattibhayena paṭikkhipati. Dutiyaṃ puṭṭho dukkhadassanādivasena paṭijānāti. Tāni vā cattāripi ñāṇāni eko sotāpattimaggoyevāti paṭijānāti, phalaṃ pana ekameva icchati, tasmā paṭikkhipati. Sakadāgāmimaggādīsupi eseva nayo.