2. Dutiyavagga

1. Parūpahārakathāvaṇṇanā

[307] Idāni parūpahārakathā nāma hoti. Tattha ye arahattaṃ paṭijānantānaṃ appatte pattasaññīnaṃ adhimānikānaṃ kuhakānaṃ vā arahattaṃ paṭijānantānaṃ asucisukkavisaṭṭhiṃ disvā "mārakāyikā devatā arahato asuciṃ upasaṃharantī"ti maññanti seyyathāpi etarahi pubbaseliyā ca aparaseliyā ca, te sandhāya atthi arahato asucisukkavisaṭṭhīti pucchā sakavādissa, paṭiññā itarassa. Idāni yasmā sukkavisaṭṭhi nāma rāgasamuṭṭhānā hoti, tasmā atthi arahato rāgoti anuyogo āraddho. So sabbopi uttānatthoyeva.

Mārakāyikā devatā attanotiādipañhe yasmā tāsaṃ devatānaṃ sukkavisaṭṭhi nāma natthi, aññesampi sukkaṃ gahetvā na upasaṃharanti, arahato pana sukkameva natthi, tasmā na hevanti paṭikkhipati.