8. Niyāmokkantikathāvaṇṇanā

[403] Idāni niyāmokkantikathā nāma hoti. Tattha yesaṃ ghaṭikārasutte jotipālassa pabbajjaṃ sandhāya "bodhisatto kassapassa bhagavato pāvacane okkantaniyāmo caritabrahmacariyo"ti laddhi seyyathāpi etarahi andhakānaṃ, te sandhāya bodhisattoti pucchā sakavādissa, laddhiyaṃ ṭhatvā paṭiññā itarassa. Tato yasmā niyāmoti vā brahmacariyanti vā ariyamaggassa nāmaṃ, bodhisattānañca ṭhapetvā pāramīpūraṇaṃ aññā niyāmokkanti nāma natthi. Yadi bhaveyya, bodhisatto sotāpanno sāvako bhaveyya, na cetamevaṃ. Kevalañhi taṃ buddhā attano ñāṇabale ṭhatvā "ayaṃ buddho bhavissatī"ti byākaronti, tasmā puna bodhisattoti anuyogo sakavādissa. Pacchimabhavaṃ sandhāya paṭikkhepo itarassa. Dutiyapañhe

Jotipālakālaṃ sandhāya paṭiññā tasseva. Sāvako hutvātiādīsupi eseva nayo. Anussaviyoti anussavena paṭividdhadhammo. Pacchimabhavaṃ sandhāya paṭikkhipitvā jotipālakāle anussavaṃ sandhāya paṭijānāti.

[404] Aññaṃ satthāranti āḷārañca rāmaputtañca sandhāya vuttaṃ. Āyasmā ānandotiādi "okkantaniyāmāva sāvakā honti, na itare okkantaniyāmā evarūpā hontī"ti dassetuṃ vuttaṃ.