5. Pañcamavagga

1. Vimuttikathāvaṇṇanā

[418] Idāni vimuttikathā nāma hoti. Tattha vipassanā, maggo, phalaṃ, paccavekkhaṇañāṇanti catunnaṃ ñāṇānaṃ vimuttiñāṇanti nāmaṃ. Tesu vipassanāñāṇaṃ niccanimittārammaṇādīhi vā vimuttattā tadaṅgavimuttibhāvena vā vimuttattā vimuttiñāṇaṃ. Maggo samucchedavimutti, phalaṃ paṭippassaddhivimutti, paccavekkhaṇa- ñāṇampana vimuttiṃ jānātīti vimuttiñāṇaṃ. Evaṃ catubbidhe vimuttiñāṇe nippariyāyena phalañāṇameva vimuttaṃ, sesāni "vimuttānī"ti vā "avimuttānī"ti vā na vattabbāni. Tasmā "idannāma vimuttiñāṇaṃ vimuttan"ti avatvā aviseseneva "vimuttiñāṇaṃ vimuttan"ti yesaṃ laddhi seyyathāpi andhakānaṃ, te sandhāya pucchā sakavādissa, paṭiññā itarassa. Puna yaṅkiñcīti puṭṭho paccavekkhaṇādīni sandhāya paṭikkhipati. Paṭipannassāti puṭṭho maggañāṇassa anāsavataṃ sandhāya