Kusalanti sekkhaputhujjanānaṃ ñāṇaṃ sandhāya vuttaṃ. Atthi arahatoti pañhesupi vipallāsalakkhaṇābhāveneva paṭikkhipati, paṭhavīnimittaṃ sandhāya paṭijānāti. Sabbeva paṭhavī hotīti sabbantaṃ paṭhavīkasiṇaṃ lakkhaṇapaṭhavīyeva hotīti pucchati. Sakavādī tathā abhāvato paṭikkhipati. Nanu paṭhavī atthi, atthi ca koci paṭhaviṃ paṭhavito samāpajjatīti pucchā sakavādissa. Tassattho:- nanu nimittapaṭhavī atthi, atthi ca koci taṃ paṭhaviṃ paṭhavitoyeva samāpajjati, na āpato vā na tejato vāti. Paṭhavī atthītiādi "yaṃ yathā atthi, taṃ tathā samāpajjantassa ñāṇaṃ viparītaṃ hoti, nibbānaṃ atthi, tampi samāpajjantassa sabbavipariyesasamugghātanaṃ maggañāṇampi te viparītaṃ hotū"ti dassanatthaṃ vuttanti.

Viparītakathāvaṇṇanā niṭṭhitā.