5. Paribhogamayapuññakathāvaṇṇanā

[483] Idāni paribhogamayapuññakathā nāma hoti. Tattha "tesaṃ divā ca ratto ca, sadā puññaṃ pavaḍḍhatī"ti ca "yassa bhikkhave bhikkhu cīvaraṃ paribhuñjamāno"ti ca evamādīni suttāni ayoniso gahetvā yesaṃ "paribhogamayaṃ nāma puññaṃ

Atha naṃ "puññaṃ nāma phassādayo kusalā dhammā, na tato aññaṃ, tasmā phassādīhi te vaḍḍhitabban"ti codetuṃ paribhogamayo phassotiādi āraddhaṃ. Taṃ sabbaṃ itarena tesaṃ avaḍḍhanato paṭikkhittaṃ. Latā viyātiādīni "kiriyāya vā bhāvanāya vā vināpi yathā latādīni sayameva vaḍḍhanti, kinte evaṃ vaḍḍhantī"ti codanatthaṃ vuttāni. Tathā panassa avaḍḍhanato na hevanti paṭikkhittaṃ.

[484] Na samannāharatīti pañhe paṭiggāhakānaṃ paribhogena purimacetanā vaḍḍhati, evantaṃ hoti puññanti laddhivasena paṭijānāti. Tato anāvajjantassāti- ādīhi puṭṭho dāyakassa cāgacetanaṃ sandhāya paṭikkhipati. Tattha anāvajjantassāti dānacetanāya purecārikena āvajjanena bhavaṅgamanāvajjantassa aparivajjentassa. Anābhogassāti nirābhogassa. Asamannāharantassāti na samannāharantassa. Āvajjanañhi bhavaṅgaṃ vicchinditvā attano gatamagge uppajjamānaṃ dānacetanaṃ samannāharati nāma. Evaṃkiccena iminā cittena asamannāharantassa puññaṃ hotīti pucchati. Amanasikarontassāti manaṃ akarontassa. Āvajjanañhi tadanantaraṃ uppajjamānaṃ manaṃ karoti nāma, evaṃ akarontassāti attho. Upayogavacanasmiñhi etaṃ bhummaṃ. Acetayantassāti cetanamanuppādentassa. Apatthayantassāti patthanāsaṅkhātaṃ kusalacchandaṃ akarontassa. Appaṇidahantassāti dānacetanāvasena cittaṃ aṭṭhapentassāti attho. Nanu āvajjantassāti vāre ābhogassāti ābhogavato. Athavā ābhogo assa, ābhogassa vā anantaraṃ taṃ puññaṃ hotīti attho.