[500] Kāmāvacaraṃ kusalaṃ savipākaṃ ācayagāmītiādikā pucchā paravādissa, paṭiññā ca paṭikkhepo ca sakavādissa. Lokiyañhi kusalavipākaṃ cutipaṭisandhiyo ceva vaṭṭañca ācinantaṃ gacchatīti ācayagāmi, lokuttarakusalaṃ cutipaṭisandhiyo ceva vaṭṭañca apacinantaṃ gacchatīti apacayagāmi. Evametaṃ savipākameva hoti, na apacayagāmīti vacanamattena avipākaṃ. Imamatthaṃ sandhāyevettha sakavādino paṭiññā ca paṭikkhepo ca veditabbāti.

Ariyadhammavipākakathāvaṇṇanā niṭṭhitā.