7. Rūpadhātuyāāyatanakathāvaṇṇanā

[519] Idāni rūpadhātuyā āyatanakathā nāma hoti. Tattha yesaṃ "rūpī manomayo sabbaṅgapaccaṅgī ahīnindriyo"ti suttaṃ nissāya brahmakāyikānaṃ ghānanimittānipi āyatanānevāti kappetvā saḷāyataniko tesaṃ attabhāvoti laddhi seyyathāpi andhakānañceva samitiyānañca, te sandhāya saḷāyatanikoti pucchā sakavādissa, laddhiyā vasena paṭiññā itarassa, atha naṃ yaṃ tattha āyatanaṃ natthi, tassa vasena codetuṃ atthi tattha ghānāyatanantiādi āraddhaṃ. Tato paravādī yaṃ tattha ajjhattikānaṃ tiṇṇaṃ āyatanānaṃ ghānādīnaṃ saṇṭhānanimittaṃ, tadeva āyatananti laddhiyā paṭijānāti. Bāhirānaṃ gandhāyatanādīnaṃ vasena puṭṭho ghānapasādādayo tattha na icchati, tasmā tesaṃ gocaraṃ paṭisevanto paṭikkhipati. Paṭilomapañhasaṃsandanapañhesupi imināva upāyena attho veditabbo.

[521] Atthi tattha ghānāyatanaṃ atthi gandhāyatanaṃ tena ghānena taṃ gandhaṃ ghāyatīti tasmiṃyeva parasamaye ekacce ācariye sandhāya vuttaṃ. Te kira tattha cha ajjhattikāni āyatanāni paripuṇṇāni icchanti, āyatanena ca nāma