3. Sukhānuppadānakathāvaṇṇanā

[747-748] Idāni sukhānuppadānakathā nāma hoti. Tattha "bahunnaṃ vata no bhagavā sukhadhammānaṃ upahattā"ti suttaṃ nissāya paro parassa sukhaṃ anuppadetīti yesaṃ laddhi seyyathāpi hetuvādānaṃ, te sandhāya pucchā sakavādissa, paṭiññā itarassa. Dukkhaṃ anuppadetīti puṭṭho pana tādisaṃ suttapadaṃ apassanto paṭikkhipati. Attano sukhantiādipañhe yaṃ attano parassa vā, taṃ anuppadātuṃ na sakkā. Yaṃ tasseva, kiṃ tattha anuppadānaṃ nāmāti paṭikkhipati. Nevattanoti ādipañhe pana yaṃ evarūpaṃ, na taṃ anuppadinnaṃ nāma bhavitumarahatīti laddhiyā paṭijānāti. No ca vata reti tādisassa sukhassa abhāvā vuttaṃ. Sukhadhammānaṃ upahattāti vacanaṃ bhagavato paresaṃ sukhuppattiyā paccayabhāvaṃ dīpeti, na annādīnaṃ viya sukhassa anuppadānaṃ, tasmā asādhakanti.

Sukhānuppadānakathāvaṇṇanā niṭṭhitā.