3. Sāmaññaphalakathāvaṇṇanā

[835-836] Idāni sāmaññaphalakathā nāma hoti. Tattha maggavīthiyampi phalasamāpattiyampi ariyamaggassa vipākacittaṃ sāmaññaphalaṃ nāmāti sakasamaye sanniṭṭhānaṃ. Yesaṃ pana tathā aggahetvā "kilesappahānañceva phaluppatti ca sāmaññaphalaṃ, tasmā asaṅkhatan"ti laddhi seyyathāpi pubbaseliyānaṃ, te sandhāya pucchā sakavādissa, paṭiññā itarassa. Sesamettha heṭṭhā vuttanayattā yathāpālimeva niyyātīti.

Sāmaññaphalakathāvaṇṇanā niṭṭhitā.