5. Suddhikasaṃsandanavaṇṇanā

[17-27] Idāni rūpādīhi saddhiṃ sacchikaṭṭhasaṃsandanaṃ hoti. Tattha rūpañcāti yathā rūpaṃ paramatthato upalabbhati, kinte puggalopi tatheva upalabbhatīti sandhāya

Yadi te rūpaṃ viya paramatthato puggalo atthi, rūpato vedanādīnaṃ viya puggalassāpi aññathattaṃ āpajjatīti anuyogo sakavādissa, samayasuttavirodhaṃ disvā paṭikkhepo paravādissa. Sesaṃ atthato pākaṭameva. Dhammato panettha sattapaññāsabhedassa sacchikaṭṭhaparamatthassa vasena sakavādīpakkhamūlake anulomapañcake sattapaññāsa anulomapañcakāni dassitāni. Paṭikammacatukkādīni saṅkhittāni. Puna paravādīpakkha- mūlakepi paccanīkānulome sattapaññāsa paṭilomapañcakāni dassitāni. Paṭikamma- catukkādīni saṅkhittāni. Tattha "vuttaṃ bhagavatā"ti vacanamattena puggalassa atthitaṃ rūpassa ca sacchikaṭṭhaparamatthavasena upalabbhanīyataṃ dassetvā ubhinnaṃ aññathattaṃ paṭijānāpanatthaṃ vuttaṃ bhagavatāti anuyogo paravādissa, sammatiparamatthānaṃ ekattanānattapañhassa ṭhapanīyattā paṭikkhepo sakavādissa. Sesamidhāpi atthato pākaṭamevāti.

Suddhikasaṃsandanavaṇṇanā niṭṭhitā.