8. Abyākatakathāvaṇṇanā

[901-902] Idāni abyākatakathā nāma hoti. Tattha "atthesā bhikkhave cetanā, sā ca kho abbohārikā"ti vacanato "sabbaṃ supinagatassa cittaṃ abyākatan"ti yesaṃ laddhi seyyathāpi ekaccānaṃ uttarāpathakānaññeva, te sandhāya pucchā sakavādissa, paṭiññā itarassa. Sesamettha yathāpālimeva niyyāti. Supinagatassa cittaṃ abbohārikanti idaṃ āpattiṃ sandhāya vuttaṃ. Supinagatassa hi pāṇātipātādivasena kiñcāpi akusalacittaṃ pavattati, vatthuvikopanaṃ pana natthīti na sakkā tattha āpattiṃ paññapetuṃ. Iminā kāraṇena taṃ abbohārikaṃ, na abyākatanti.

Abyākatakathāvaṇṇanā niṭṭhitā.