[๑๖๘๙] อตฺถิ อรหโต ปุญฺญูปจโยติ ฯ อามนฺตา ฯ อตฺถิ อรหโต อปุญฺญูปจโยติ ฯ น เหวํ วตฺตพฺเพ ฯเปฯ นตฺถิ อรหโต อปุญฺญูปจโยติ ฯ อามนฺตา ฯ นตฺถิ อรหโต ปุญฺญูปจโยติ ฯ น เหวํ วตฺตพฺเพ ฯเปฯ

[๑๖๙๐] อตฺถิ อรหโต ปุญฺญูปจโยติ ฯ อามนฺตา ฯ อรหา ปุญฺญาภิสงฺขารํ อภิสงฺขโรติ อาเนญฺชาภิสงฺขารํ อภิสงฺขโรติ คติสํวตฺตนิยํ กมฺมํ กโรติ ภวสํวตฺตนิยํ กมฺมํ กโรติ อิสฺสริยสํวตฺตนิยํ กมฺมํ กโรติ อธิปจฺจสํวตฺตนิยํ กมฺมํ กโรติ มหาโภคสํวตฺตนิยํ กมฺมํ กโรติ มหาปริวารสํวตฺตนิยํ กมฺมํ กโรติ เทวโสภคฺยสํวตฺตนิยํ กมฺมํ กโรติ มนุสฺสโสภคฺยสํวตฺตนิยํ กมฺมํ กโรตีติ ฯ น เหวํ วตฺตพฺเพ ฯเปฯ

[๑๖๙๑] อตฺถิ อรหโต ปุญฺญูปจโยติ ฯ อามนฺตา ฯ อรหา อาจินาตีติ ฯ น เหวํ วตฺตพฺเพ ฯเปฯ อรหา อปจินาตีติ ฯ น เหวํ วตฺตพฺเพ ฯเปฯ อรหา ปชหตีติ ฯเปฯ อรหา อุปาทิยตีติ ฯเปฯ อรหา วิสิเนตีติ ฯเปฯ อรหา อุสฺสิเนตีติ ฯเปฯ อรหา วิธูเปตีติ ฯเปฯ อรหา สนฺธูเปตีติ ฯ น เหวํ วตฺตพฺเพ ฯเปฯ นนุ อรหา เนวาจินาติ น อปจินาติ อปจินิตฺวา ฐิโตติ ฯ อามนฺตา ฯ หญฺจิ อรหา เนวาจินาติ นาปจินาติ อปจินิตฺวา ฐิโต โน วต เร วตฺตพฺเพ อตฺถิ อรหโต ปุญฺญูปจโยติ ฯ

[๑๖๙๒] นนุ อรหา เนว ปชหติ น อุปาทิยติ ปชหิตฺวา ฐิโต เนว วิสิเนติ น อุสฺสิเนติ วิสินิตฺวา ฐิโต เนว วิธูเปติ น สนฺธูเปติ วิธูเปตฺวา ฐิโตติ ฯ อามนฺตา ฯ หญฺจิ อรหา เนว วิธูเปติ น สนฺธูเปติ วิธูเปตฺวา ฐิโต โน วต เร วตฺตพฺเพ อตฺถิ อรหโต ปุญฺญูปจโยติ ฯ