[๑๑๖๑] ปฐวี กมฺมวิปาโกติ ฯ อามนฺตา ฯ ปฐวี ปคฺคหนิคฺคหูปคา เฉทนเภทนูปคาติ ฯ อามนฺตา ฯ กมฺมวิปาโก ปคฺคหนิคฺคหูปโค เฉทนเภทนูปโคติ ฯ น เหวํ วตฺตพฺเพ ฯเปฯ

[๑๑๖๒] ลพฺภา ปฐวี เกตุํ วิเกตุํ อาฐเปตุํ โอจินิตุํ วิจินิตุนฺติ ฯ อามนฺตา ฯ ลพฺภา กมฺมวิปาโก เกตุํ วิเกตุํ อาฐเปตุํ โอจินิตุํ วิจินิตุนฺติ ฯ น เหวํ วตฺตพฺเพ ฯเปฯ

[๑๑๖๓] ปฐวี ปเรสํ สาธารณาติ ฯ อามนฺตา ฯ กมฺมวิปาโก ปเรสํ สาธารโณติ ฯ น เหวํ วตฺตพฺเพ ฯเปฯ

[๑๑๖๔] กมฺมวิปาโก ปเรสํ สาธารโณติ ฯ อามนฺตา ฯ นนุ วุตฺตํ ภควตา อสาธารณมญฺเญสํ อโจราหรโณ นิธิ กยิราถ มจฺโจ ปุญฺญานิ ส เว สุจริตํ จเรติ อตฺเถว สุตฺตนฺโตติ ฯ อามนฺตา ฯ เตน หิ น วตฺตพฺพํ กมฺมวิปาโก ปเรสํ สาธารโณติ ฯ