TIPITAKA Volume 37 : PALI ROMAN Abhidhamma Pitaka Vol 4 : Abhi. Kathāvatthu

[15] Puggalo nūpalabbhati sacchikaṭṭhaparamaṭṭhenāti . āmantā . Sabbadā puggalo nūpalabbhati sacchikaṭṭhaparamaṭṭhenāti . na hevaṃ vattabbe. {15.1} Ājānāhi niggahaṃ hañci puggalo nūpalabbhati sacchikaṭṭhaparamaṭṭhena tena vata re vattabbe sabbadā puggalo nūpalabbhati sacchikaṭṭhaparamaṭṭhenāti yaṃ tattha vadesi vattabbe kho puggalo nūpalabbhati sacchikaṭṭhaparamaṭṭhena no ca vattabbe sabbadā puggalo nūpalabbhati sacchikaṭṭhaparamaṭṭhenāti micchā {15.2} no ce pana vattabbe sabbadā puggalo nūpalabbhati sacchikaṭṭhaparamaṭṭhenāti no vata re vattabbe puggalo nūpalabbhati sacchikaṭṭhaparamaṭṭhenāti yaṃ tattha vadesi vattabbe kho puggalo nūpalabbhati sacchikaṭṭhaparamaṭṭhena no ca vattabbe sabbadā puggalo nūpalabbhati sacchikaṭṭhaparamaṭṭhenāti micchā .pe.