TIPITAKA Volume 37 : PALI ROMAN Abhidhamma Pitaka Vol 4 : Abhi. Kathāvatthu Ekamaggakathā

[1747] Ekena ariyamaggena cattāri sāmaññaphalāni sacchikarotīti. Āmantā . catunnaṃ phassānaṃ .pe. Catassannaṃ paññānaṃ samodhānaṃ hotīti. Na hevaṃ vattabbe .pe. ekena ariyamaggena cattāri sāmaññaphalāni sacchikarotīti . āmantā . sotāpattimaggenāti . na hevaṃ vattabbe .pe. sakadāgāmimaggena .pe. anāgāmimaggenāti . Na hevaṃ vattabbe .pe. katamena maggenāti . arahattamaggenāti. Arahattamaggena sakkāyadiṭṭhiṃ vicikicchaṃ sīlabbataparāmāsaṃ Parāmāsaṃ jahatīti . na hevaṃ vattabbe .pe. Arahattamaggena sakkāyadiṭṭhiṃ vicikicchaṃ sīlabbataparāmāsaṃ jahatīti . āmantā . nanu tiṇṇaṃ saññojanānaṃ pahānaṃ sotāpattiphalaṃ vuttaṃ bhagavatāti. {1747.1} Āmantā . hañci tiṇṇaṃ saññojanānaṃ pahānaṃ sotāpattiphalaṃ vuttaṃ bhagavatā no vata re vattabbe arahattamaggena sakkāyadiṭṭhiṃ vicikicchaṃ sīlabbataparāmāsaṃ jahatīti .pe. arahattamaggena oḷārikaṃ kāmarāgaṃ oḷārikaṃ byāpādaṃ jahatīti . na hevaṃ vattabbe .pe. Arahattamaggena oḷārikaṃ kāmarāgaṃ oḷārikaṃ byāpādaṃ jahatīti. {1747.2} Āmantā . nanu kāmarāgabyāpādānaṃ tanubhāvaṃ sakadāgāmiphalaṃ vuttaṃ bhagavatāti . āmantā . Hañci kāmarāgabyāpādānaṃ tanubhāvaṃ sakadāgāmiphalaṃ vuttaṃ bhagavatā no vata re vattabbe arahattamaggena oḷārikaṃ kāmarāgaṃ oḷārikaṃ byāpādaṃ jahatīti . arahattamaggena aṇusahagataṃ kāmarāgaṃ aṇusahagataṃ byāpādaṃ jahatīti . na hevaṃ vattabbe .pe. Arahattamaggena aṇusahagataṃ kāmarāgaṃ aṇusahagataṃ byāpādaṃ jahatīti. {1747.3} Āmantā . nanu kāmarāgabyāpādānaṃ anavasesappahānaṃ anāgāmiphalaṃ vuttaṃ bhagavatāti . āmantā . hañci kāmarāgabyāpādānaṃ anavasesappahānaṃ anāgāmiphalaṃ vuttaṃ bhagavatā no vata re vattabbe arahattamaggena aṇusahagataṃ kāmarāgaṃ aṇusahagataṃ byāpādaṃ jahatīti.