TIPITAKA Volume 37 : PALI ROMAN Abhidhamma Pitaka Vol 4 : Abhi. Kathāvatthu Brahmacariyakathā

[255] Natthi devesu brahmacariyavāsoti . āmantā . Sabbe devā jaḷā eḷamūgā aviññū hatthasaṃvācikā na paṭibalā subhāsitadubbhāsitānaṃ atthamaññātuṃ sabbe devā na buddhe pasannā na Dhamme pasannā na saṅghe pasannā na buddhaṃ bhagavantaṃ payirupāsanti na buddhaṃ bhagavantaṃ pañhaṃ pucchanti na buddhena bhagavatā pañhe visajjite attamanā sabbe devā kammāvaraṇena samannāgatā kilesāvaraṇena samannāgatā vipākāvaraṇena samannāgatā assaddhā acchandikā duppaññā abhabbā niyāmaṃ okkamituṃ kusalesu dhammesu sammattaṃ sabbe devā mātughātakā pitughātakā arahantaghātakā ruhiruppādakā saṅghabhedakā sabbe devā pāṇātipātino adinnādāyino kāmesu micchācārino musāvādino pisuṇavācā pharusavācā samphappalāpino abhijjhāluno byāpannacittā micchādiṭṭhikāti. Na hevaṃ vattabbe .pe. {255.1} Nanu atthi devā ajaḷā aneḷamūgā viññū na hatthasaṃvācikā paṭibalā subhāsitadubbhāsitānaṃ atthamaññātuṃ atthi devā buddhe pasannā dhamme pasannā saṅghe pasannā buddhaṃ bhagavantaṃ payirupāsanti buddhaṃ bhagavantaṃ pañhaṃ pucchanti buddhena bhagavatā pañhe visajjite attamanā honti atthi devā na kammāvaraṇena samannāgatā na kilesāvaraṇena samannāgatā na vipākāvaraṇena samannāgatā saddhā chandikā paññavanto bhabbā niyāmaṃ okkamituṃ kusalesu dhammesu sammattaṃ atthi devā na mātughātakā na pitughātakā na arahantaghātakā na ruhiruppādakā na saṅghabhedakā atthi devā na pāṇātipātino na adinnādāyino na kāmesu micchācārino na musāvādino na pisuṇavācā na pharusavācā na samphappalāpino na Abhijjhāluno abyāpannacittā sammādiṭṭhikāti. Āmantā. {255.2} Hañci atthi devā ajaḷā aneḷamūgā viññū na hatthasaṃvācikā paṭibalā subhāsitadubbhāsitānaṃ atthamaññātuṃ .pe. Atthi devā buddhe pasannā .pe. sammādiṭṭhikā no vata re vattabbe natthi devesu brahmacariyavāsoti.