TIPITAKA Volume 37 : PALI ROMAN Abhidhamma Pitaka Vol 4 : Abhi. Kathāvatthu Nirodhasamāpattikathā

[1100] Nirodhasamāpatti asaṅkhatāti . āmantā . nibbānaṃ tāṇaṃ leṇaṃ saraṇaṃ parāyanaṃ accutaṃ amatanti . na hevaṃ vattabbe .pe. nirodhasamāpatti asaṅkhatā nibbānaṃ asaṅkhatanti . āmantā . Dve asaṅkhatānīti . na hevaṃ vattabbe .pe. dve asaṅkhatānīti. Āmantā . dve tāṇāni .pe. antarikā vāti. Na hevaṃ vattabbe .pe. nirodhasamāpatti asaṅkhatāti . āmantā . atthi keci nirodhaṃ samāpajjanti paṭilabhanti uppādenti samuppādenti uṭṭhāpenti 1- samuṭṭhāpenti 1- nibbattenti abhinibbattenti janenti sañjanentīti . Āmantā . atthi keci asaṅkhataṃ samāpajjanti paṭilabhanti uppādenti samuppādenti uṭṭhāpenti 1- samuṭṭhāpenti 1- nibbattenti abhinibbattenti janenti sañjanentīti . na hevaṃ vattabbe .pe. Nirodho vodānaṃ vuṭṭhānaṃ paññāyatīti . āmantā . asaṅkhatā vodānaṃ vuṭṭhānaṃ @Footnote:1. Ma. uṭṭhapenti, samuṭṭhapenti. Paññāyatīti . na hevaṃ vattabbe .pe. nirodhaṃ samāpajjantassa paṭhamaṃ nirujjhati vacīsaṅkhāro tato kāyasaṅkhāro tato cittasaṅkhāroti. Āmantā . asaṅkhataṃ samāpajjantassa paṭhamaṃ nirujjhati vacīsaṅkhāro tato kāyasaṅkhāro tato cittasaṅkhāroti . na hevaṃ vattabbe .pe. Nirodhā vuṭṭhahantassa paṭhamaṃ uppajjati cittasaṅkhāro tato kāyasaṅkhāro tato vacīsaṅkhāroti . āmantā . asaṅkhatā vuṭṭhahantassa paṭhamaṃ uppajjati cittasaṅkhāro tato kāyasaṅkhāro tato vacīsaṅkhāroti . Na hevaṃ vattabbe .pe.