TIPITAKA Volume 37 : PALI ROMAN Abhidhamma Pitaka Vol 4 : Abhi. Kathāvatthu Sampayuttakathā

[1134] Natthi keci dhammā kehici dhammehi sampayuttāti āmantā . nanu atthi keci dhammā kehici dhammehi sahagatā sahajātā saṃsaṭṭhā ekuppādā ekanirodhā ekavatthukā ekārammaṇāti . Āmantā . hañci atthi keci dhammā kehici dhammehi sahagatā sahajātā saṃsaṭṭhā ekuppādā ekanirodhā ekavatthukā ekārammaṇā no vata re vattabbe natthi keci dhammā kehici dhammehi sampayuttāti.