TIPITAKA Volume 37 : PALI ROMAN Abhidhamma Pitaka Vol 4 : Abhi. Kathāvatthu

[50] Puggalo upalabbhati sacchikaṭṭhaparamaṭṭhenāti . āmantā . Rūpaṃ puggaloti. Na hevaṃ vattabbe. {50.1} Ājānāhi niggahaṃ hañci puggalo upalabbhati sacchikaṭṭhaparamaṭṭhena tena vata re vattabbe rūpaṃ puggaloti yaṃ tattha vadesi vattabbe kho puggalo upalabbhati sacchikaṭṭhaparamaṭṭhena no ca vattabbe rūpaṃ puggaloti micchā {50.2} no ce pana vattabbe rūpaṃ puggaloti no vata re vattabbe puggalo upalabbhati sacchikaṭṭhaparamaṭṭhenāti yaṃ tattha vadesi vattabbe kho puggalo upalabbhati sacchikaṭṭhaparamaṭṭhena no ca vattabbe rūpaṃ puggaloti micchā .pe.