TIPITAKA Volume 37 : PALI ROMAN Abhidhamma Pitaka Vol 4 : Abhi. Kathāvatthu Rūparāgo rūpadhātupariyāpannotiādikathā

[1682] Rūparāgo rūpadhātupariyāpannoti . āmantā . Samāpattesiyo upapattesiyo diṭṭhadhammasukhavihāro samāpattesiyena cittena upapattesiyena cittena diṭṭhadhammasukhavihārena cittena sahagato sahajāto saṃsaṭṭho sampayutto ekuppādo ekanirodho ekavatthuko ekārammaṇoti . na hevaṃ vattabbe .pe. nanu na samāpattesiyo na upapattesiyo na diṭṭhadhammasukhavihāro na samāpattesiyena cittena .pe. ekavatthuko ekārammaṇoti . āmantā . hañci na samāpattesiyo na upapattesiyo na diṭṭhadhammasukhavihāro na samāpattesiyena cittena .pe. ekavatthuko ekārammaṇo no vata re vattabbe rūparāgo rūpadhātupariyāpannoti.