7. Anusayayamaka

paricchedaparicchinnuddesavāravaṇṇanā.

[1] Idāni tesaññeva mūlayamake desitānaṃ kusalādidhammānaṃ labbhamānavasena ekadesaṃ saṅgaṇhitvā saṅkhārayamakānantaraṃ desitassa anusayayamakassa atthavaṇṇanā

Tattha pālivavatthānaṃ tāva veditabbaṃ:- imasmiñhi anusayayamake khandhayamakādīsu viya desanaṃ akatvā aññena nayena pālidesanā katā. Kathaṃ? paṭhamaṃ tāva paricchedato uddesato uppattiṭṭhānatoti tīhākārehi anusaye gāhāpetuṃ paricchedavāro paricchinnuddesavāro uppattiṭṭhānavāroti tayo vārā desitā. Tato sattannaṃ mahāvārānaṃ vasena anusaye yojetvā yamakadesanā katā. Tattha satta anusayāti ayaṃ "satteva, na tato uddhaṃ, na heṭṭhā"ti gaṇanaparicchedena paricchinditvā anusayānaṃ desitattā paricchedavāro nāma. Kāmarāgānusayo .pe. Avijjānusayoti ayaṃ paricchedavārena paricchinnānaṃ dhammānaṃ nāmamattaṃ uddisitvā "ime nāma te"ti desitattā paricchinnuddesavāro nāma. Kattha kāmarāgānusayo anuseti .pe. Ettha avijjānusayo anusetīti ayaṃ "imesu nāma vāresu ime anusayā anusentī"ti evaṃ tesaññeva uppattiṭṭhānassa desitattā uppattiṭṭhānavāro nāma.